El tran - Anita Pittoni

El tran cori rabioso su le sine.
"Cossa te fa, tranvier?
Te xe imbilà,
te se sfoghi dandone sti scassoni?
Te urtemo qua impalai?
In pìe, sentadi,
te ne sbaloti come marionete
coi fili laschi,
'bandonade.

No sta esser rabioso,
cussì senza maniera!
Pòrtine pian,
no sta frenar de colpo,
va lisso, almeno ti"

Le dondola le teste,
el cuor se strenzi
che sto scasson
el se combina drento
con la paura sconta,
el zuca fora tuto,
el zuca.

"Va lisso, tranvier,
xe brutto quel che te fa,
sfogarse con noi,
coss' te sa ti de noi,
bruto omo cativo
te darìa un pugno in tala testa,
semo el tu' pan, semo! "

El tu' pan? El mio pan?
Metèndome al tu' posto
cossa farìa?

Darìa scassoni, darìa
sì,
assai più forti,
zente de paia
zente insempiada
persa
zente senza figà,
musi de piera,
scàssili, tranvier
che i spudi fora l'anima,
che sia finì,
guarda che musi,
che voia de spacar ste teste.
Ferma, tranvier,
speta che smonto.