Cos'è?


Voce alla Poesia, voce ai poeti, specie a quelli meno conosciuti.

Voce di terra, di vento e di dialetto .

Voce di uomini e donne terribili.

Voce a volte anche mia..manina piccola che cerca la tua.

sabato 30 novembre 2013

Visione in Viale


L'abbraccio
de amor xe
come la piova d'istà
la riva liziera
la ridi e la sta
portando ristoro
al me cor, sofegà.



domenica 24 novembre 2013

I pié - Giano Perale


Gregorio, quand che se lava i pié
'l lo fa par pulizia.
Gigio par la morosa,
ma mi che son poeta, me li lave
parche so
che diman de matina
farò mano fadiga

a corer incontro a 'l sol.


mercoledì 20 novembre 2013

Delirio 1984 - Federico Tavan



Bevo kerosene
appoggiato al vuoto.
La maestra 
mi ha dato i compiti per casa.
Dopo posso uscire a giocare
con i pantaloni corti 
e le ginocchia nere?
Il kerosene sa di acido 
ma è molto sostanzioso.
Mamma
gli altri bambini mi picchiano.
Mamma
perchè non sono come loro?
Domani
farò la prima comunione
e tu le frittelle
mamma
ti voglio bene.
Kerosene burro e marmellata.
Posso andare con la slitta?
Mi fai fare il ruttino?
Mamma 
m'hanno chiesto
cosa farò da grande.


mercoledì 13 novembre 2013

Adìo Poeta. In morte di Federico Tavan


Adìo Federico, te salude con in man i fior sciopadi da quei but che te m'à regalà, senza cognoserme.
Trati do da la finestra te'l canton, insieme ai libri.
Adìo matuscel, finì de patir le to man legere avrà solche el bon viso de to mare,da curar, carezar
dess che anche ti te se ndat do.
Adìo amigo el timp el passa per duc par alcuni brigante par altri canaja. 
Par mi l'è stat spina rovente fracada in gola, reclamando la me viltà de un tempo
o fursi l'esser stat massa de sest, savajot, par no desturbar...che l'è pecà.
Podesse tornar indrio, svolerie su par quele scale
co na peada trarie do la porta e an baso in boca te sciocarie.
Adìo amigo, fior de zoventù fresca, sogno puro e umile
oci de rara umanità che a fadiga catarò.
Adìo mazarol in festa de 'l me cor a la prima godesta de le to poesie.
Adìo ridata piena de mi bocieta quand che ò capì che 
la poesia 
l'è la sola verità.

Adìo 

Adìo

Adìo

E speteme 
speteme Federico
che ò braz cussi curti
che no ghe rive proprio 
a imbrazarte.

lunedì 11 novembre 2013

La note de San Martin -Ernesto Calzavara


Seco, tra do nissioli
omo te dormi.
No te gà fioli che magna.
Ma, 
ne la to vecia casa de campagna
graneri e caneva pina, paron.

Fora xe tuto scuro e gran quiete.
Par aria svola i sogni
dela zente che dorme;
e ti, sconto sorze, te roseghi
in sofita, in graner, chissà mai dove,
panocie.
No more mai finchè xe note el tempo.
No more mai sto rosegar de sorze
el gran,la zoventù, la vita, tuto...
Come te si reduto, omo!

No more mai
sto far e po desfar e far de novo,
sto rumegar nel graner de la mente.
el cambiar siera,
el cascar de le fogie par tera.

Da un travo del sofito
un gran ragno co' le gambe verte
el varda che te dormi, omo.
Te si magro come el contadin de istà
e la to vita smarìa come el sol
da ste nebiéte de autuno.

Graneri e caneva piena.
Cossa te manca, omo?
Quel fià de fogo de cusina che te scalda?
Quel fià de voce de dona zovene che te incanta?
L'amigo che te incontra,
"Bondì, vecio!" par strada?
El can curioso de nasar
che slonga el sgnèco?
El gato vecio
che ciapa ancora a svolo
le farfalete in graner?

Graneri pieni e vita voda.
Graneri pieni e vita che se incioda.
Graneri pieni e la solita roda
d'ogni ano, d'ogni stagion
che se svolta nel tempo dei to afani.
Tut'i ani cussì, senza costrutto.
Come te si reduto, omo.

Tuta note cussì, sorze el te scolta.
El scolta i repetòni
del martorel sui copo,
dei altri sorzi, dei gati, de chissà chi,
la piova el vento 
e sto tormento che no termina mai.
"Scampar da mi, scampar par no sentirme
par no vedarme più..."

E dopo el tase.
Tase el lagno, tase el ragno.
Tase el scuro, tase el muro,
el vento, el sorze, le altre bestie,
molestie...

El scolta.
Se move ancora le panoscie in graner.
Chi che sia?
Forse i xe Lori che vien.
"Portete via sta casa che te m'ha lassà,
sti fruteri, tute ste piante, st'erbe,
sti osei che canta, ste bele acquete ciare,
sto ciel par sora.
Portete via anca mia, pare, xe mejo,
se ancora te me vol"

"No, fiol, gnente scampar
gnente portarte via.
Strussiar anca ti come noaltri,
se te pol.
Fiol, te gavemo rancurà
finchè gavemo possudo.
Te si vegnudo qua part ti.
Adesso ocòr che te ghe pensi ti.
Longa o curta che sia la to zornada,
ogni tanto vien zo na tempestada.
No la xe mai finìa...
e vivar xe patir,
morir xe vivar."

'desso xe un fià de ciaro.
Un pettirosso, fora, che canta.
Svéiete, omo.