Divertimento-Ernesto Calzavara

Far l'amor
sora i radici rossi de un orto
drento un baro de ortighe
nudi
sora le tastiere unite
de do pianoforti
a coa
fra do elettromagneti
de pochi volts
stravacai sul banco de 'na banca
sora 'na superfice irta
di ostacoli morali.

Far l'amore
butai zo sui tapei duri
de le ipotesi inverificabili
de le speranze deluse
tra le imagini e i segni
taci sora 'na tavola de logaritmi
sconti soto 'na vecia scala
de valori culturali
millimetrata
a cavalo de un raggio laser
tuti do streti
in una capariola celeste
sfinidi da un calcolo
infinitesimale
fa do parallele convergenti
giusto però sora la linea
del meridiano de Greenwich.

Far l'amor
coi oci su le zuche baruche
dei nostri destini inçerti
par gl'inçerti mestieri de l'omo
nel cuor de 'na cassaforte
(metri do par tre)
co' dentro luce al neon busi par respirar
piena de speranze de marenghi d'oro novi
de veci dobloni de Spagna
de decagrammi siracusani
perle e brilanti.

Far l'amor
convinti da la persuasione occulta
de un detersivo al mugheto
biodegradabile
ne la panza de un forno crematorio
stuà
destinà dopo a far pan
destirai su l'altar
de 'na ciesa sconsacrada
(e chi lo sa?).

Far l'amor
in un buso de la gran scheda perforata
de Dio
a mile metri soto tera
quando che sciopa in alto
il Gran Ordigno
o in fondo a un cratere de luna
con zuppa inglese tra due seni.

Far l'amor
comodai sora un leto de ciodi basso
o su nel bombaso
de 'na nuvola rossa al tramonto
della nostra civiltà
o da ultimi turisti ancora vivi
su l'erba zala
de la Valle di Giosafat
intanto che sona le trombe
il Giudizio Universale.

Far l'amor.