'Na storia de guera-Manlio Malabotta

A Citanova
vizin de vila Rainis
(che se gavessi crompà
fussi stada par mi
pochi dani de guera
e, fin che vivo,
tanta maliconia)
te me gà invità
a un tè
'n casa tua.
Un tè
co' i biscotini
bevù
da do bravi putèi.
Po'
'n tè tra 'n altro
e le tete de più.
Te ieri de pel
'lora de moda,
biondo:
raza eleta
e valchiria
de sentimenti.
Un regalo
par mi, moreto...
Ma semo 'ndai
'vanti l'istesso,
ti parlando
solo ben dei tedeschi,
mi tasendo
e fazendo l'amor.
Pa' 'l resto no' me fidavo
e cussì te go tasù tutto
co' go dovesto scampar
cascà drento, de mona,
in t-una "missione alleata".
Gavemo finida la guera
mi sconto 'n casa de Emilio,
ti sfolada sul Piave
par via del prefeto
trasferido de Pola a Treviso.
Te go zercada de novo
e te go trovada a Vidor
in t-una casa imbiecada:
sul cortil
a saludarme
le tue peze
sventolava come bandierete,
ma no iera bandiere
de amor.
Al mio primo slongar
de le man
la tua sentenza xe stada
"buoni amici, soltanto..."
e saltado xe fora
'l tedesco,
'l vero amor finalmente,
felvèbel in man di inglesi:
muro biondo
fra ti e fra mi.
Dopo,
no go savudo più gnente,
gnanca chi sia rivado
par primo
a sistemar la tua storia:
se 'l tedesco
o tu' marì prigionier
o 'l prefeto
o qualchidùn altro.
Ma se ghe penso,
passai tanti ani,
più che de raza
teutonica o nostrana
te ieri inveze
raza de putana.