Sta lingua - Fernando Bandini

Sta lingua la xe quela
che doparava me nona stanote
vardandome da dentro la soàsa.
La boca stava sarà, le parole
mi le sentiva ciare.

Me nona
la ga imparà sta lingua da le anguane
che vien zo da le grote
co sona mesanote
caminando rasente le masiere:
e da le rose
dove le lava fodare e nissioi
se sente ciof e ciof sora le piere
e te riva im ferume de parole
supià dal vento
che zola par le altane.

Me nona
se ga levà na note co le anguane
par vegnere in sità.
Par paura dei spiriti che va
de sbrindolon tel scuro
la diseva pai trosi la corona.
La xe rivà de matina bonora:
subito dopo un brolo de pomari
ghe iera case e case da ogni banda.

La domandava el nome de na strada,
scoltando na sirena
la xe rivà in filanda.
< Senti sta tosa come che la parla >
i pensava vardandola tei oci
i botegari e i coci,
< la pare un stelarin che vien dai orti > ...

Sta lingua mi
la so ma no la parlo,
la xe lingua de morti.