La note de San Martin -Ernesto Calzavara

Seco, tra do nissioli
omo te dormi.
No te gà fioli che magna.
Ma, 
ne la to vecia casa de campagna
graneri e caneva pina, paron.

Fora xe tuto scuro e gran quiete.
Par aria svola i sogni
dela zente che dorme;
e ti, sconto sorze, te roseghi
in sofita, in graner, chissà mai dove,
panocie.
No more mai finchè xe note el tempo.
No more mai sto rosegar de sorze
el gran,la zoventù, la vita, tuto...
Come te si reduto, omo!

No more mai
sto far e po desfar e far de novo,
sto rumegar nel graner de la mente.
el cambiar siera,
el cascar de le fogie par tera.

Da un travo del sofito
un gran ragno co' le gambe verte
el varda che te dormi, omo.
Te si magro come el contadin de istà
e la to vita smarìa come el sol
da ste nebiéte de autuno.

Graneri e caneva piena.
Cossa te manca, omo?
Quel fià de fogo de cusina che te scalda?
Quel fià de voce de dona zovene che te incanta?
L'amigo che te incontra,
"Bondì, vecio!" par strada?
El can curioso de nasar
che slonga el sgnèco?
El gato vecio
che ciapa ancora a svolo
le farfalete in graner?

Graneri pieni e vita voda.
Graneri pieni e vita che se incioda.
Graneri pieni e la solita roda
d'ogni ano, d'ogni stagion
che se svolta nel tempo dei to afani.
Tut'i ani cussì, senza costrutto.
Come te si reduto, omo.

Tuta note cussì, sorze el te scolta.
El scolta i repetòni
del martorel sui copo,
dei altri sorzi, dei gati, de chissà chi,
la piova el vento 
e sto tormento che no termina mai.
"Scampar da mi, scampar par no sentirme
par no vedarme più..."

E dopo el tase.
Tase el lagno, tase el ragno.
Tase el scuro, tase el muro,
el vento, el sorze, le altre bestie,
molestie...

El scolta.
Se move ancora le panoscie in graner.
Chi che sia?
Forse i xe Lori che vien.
"Portete via sta casa che te m'ha lassà,
sti fruteri, tute ste piante, st'erbe,
sti osei che canta, ste bele acquete ciare,
sto ciel par sora.
Portete via anca mia, pare, xe mejo,
se ancora te me vol"

"No, fiol, gnente scampar
gnente portarte via.
Strussiar anca ti come noaltri,
se te pol.
Fiol, te gavemo rancurà
finchè gavemo possudo.
Te si vegnudo qua part ti.
Adesso ocòr che te ghe pensi ti.
Longa o curta che sia la to zornada,
ogni tanto vien zo na tempestada.
No la xe mai finìa...
e vivar xe patir,
morir xe vivar."

'desso xe un fià de ciaro.
Un pettirosso, fora, che canta.
Svéiete, omo.