El gato - Ernesto Calzavara

Dedicata al mio amico Riccio Banana.

Gato sentà su le gambe da drio,
te me vardi, gato. Parchè?
Pien de pulzi anca ti,
gato, te si.
Aàhm par de qua, aàhm par de là
co la boca.
Aàhm par de su, aàhm par de zò.
E anca mi morsegòni de qua,
morsegòni de là;
sti maledeti omeni che me sponze,
ste passion che me monze.
Aàhm gato, aàhm
e po' leca e po' leca.
Adesso sta quieto,
el pelo xe neto,
baucòto de un gato.
I oci che incanta
la coa che xe alta
(ciò varda: anca ti 
i balon come mi!)
Ma adesso po' basta.
Insegname invece un poco a vardar:
l'oseleto amalà che fa el tabaro
dentro la so gabieta,
el gatin cèo par tera
che no fa ancora meo, che fa min
pian pianin,
'na mosca che svola par aria,
'na rama che dindola in alto.
'na nuvola in ciel che se slarga,
'na fogia che trema d'amor...

Come? Adesso te scampi
in do salti, in do lampi?
Torna da mi doman, gato, te prego
senza de ti no son bon de vardar.